UDAL EUSKALDUNEN MANKOMUNITATEA (UEMA)

Mutrikuko udalak 2001eko ekainaren 2an hartu zuen Udal Euskaldunen Mankomunitatean sartzeko erabakia, horretarako bereziki deitutako osoko udalbatzan.

Udalean ordezkaritza duten hiru alderdiek euskararen normalizazioaren prozesuan herri euskaldunek aurrea hartu behar dutela agertu zuten eta, horretan, mankomunitateko udalerriekin elkarlanean jarduteak bidea erraztuko lukeela agertu zuten.

Mutrikuko Udalak, UEMAn sartzearekin batera, haren helburuak bere egin zituen:

· Udalerri euskaldunetan herritarrek egiten duten bizitza sozial guztia, publikoa zein pribatua euskaraz izan dadin bideak urratzea.

· Udalerri euskaldun guztiek bat eginik, euskara nagusi izango den lur-gunea osatzea.

Ekainaren 10ean, Arbizun egindako ohizko bileran, UEMAren zuzendaritza batzordeak onartu egin zuen Mutriku mankomunitatean sartzea.