Udalak berdintasun arloko teknikari baten zerbitzuak kontratatu ditu

Mutrikuko Udalak lanari ekin dio, udalerriko gizonezkoen eta emakumezkoen berdintasunaren lorpenean aurrera egiteko asmotan.

Udalak, aurreko legearen azkenaldian, udal-barruko berdintasun plana onartu zuen. Bertan jasotakoaren arabera, aurreikusita zegoen Udal barruko egoeraren diagnosia egitea. Dagoeneko, diagnosia eginda dago, eta iritsi da jarduera zehatzei heltzeko unea. Mutrikuko udalak arlo horretan eman duen lehendabiziko urratsa pertsona bat kontratatzea izan da (Debako eta Elgoibarko udalekin batera), "berdintasunaren esparruan erreferentzia izan dadin".

Goiatz Minguez ermuarra, Mugibe aholkularitzako langilea, izango da "berdintasunerako bidea irekitzeko" zeregina izango duena (Debegesa bailarako agentziaren bidez). Aurrerantzean, Goiatzek izango du genero berdintasunaren arloan dauden jarduerei eta zerbitzuei buruzko informazioa herritarrei emateko ardura. Jendaurreko ordutegia honakoa izango da: 09.00etatik 14.00etara. Asteartetan Udaletxean egongo da, eta ostiraletan, berriz, Debegesak Eibarren duen egoitzan.

Herritarrei informazioa eta aholkua eman ez ezik, Goiatz Minguezek udalerrira begirako berdintasun planaren bilakaeraren jarraipen zuzena ere egingo du. Plan hau iazko udazkenean prestatzen hasi ziren; eta hasiera batean behintzat, "Uda aurretik prest egon beharko da, Udal Korporazioak bozketa egin dezan". Horretaz gain, berdintasun teknikariak emakumeen elkarteekin, eta beste zenbait lekutan, antzeko planen ardura dutenekin harremanetan jarri beharko du. Teknikariarekin harremanetan jarri nahi dutenek, mezu bat bidal dezakete honako helbide honetara: berdintasuna@debegesa.com.